ባሕር ዳር ከነማ የጣናው ሞገድ የከተማችን ብርቅዬ መለያ እና መኩሪያችን ክለብ ነው። አቶ ጎሹ እንዳላማው የባሕር ዳር ከተማ ከንቲቫ እና የክለቡ ፕሬዚዳንት
ህዳር 30/2017፤ (ባሕር ዳር ከተማ ስፖርት ክለብ)፦ ባሕር ዳር ከተማ ከጎፈሬ ጋር በስፖርት የትጥቅ አቅርቦት የስፖንሰርሺፕ ስምምነት ተፈራረመ
የጎፈሬ ስፖርት ትጥቅ ማምረቻ ሃላ/የተ/የግል ማህበር የተሰኘ ሀገር በቀል የስፖርት ትጥቅ አቅራቢ ድርጅት ከዚህ ቀደም ከባሕርዳር ከተማ ስፖርት ክለብ ጋር የስፖርት ትጥቅ በስፖንሰርና በሽያጭ ሲያቀርብ የነበረ ሲሆን የባሕር ዳር ከተማ ስፖርት ክለብ ፕሬዚዳንት አቶ ጎሹ እንዳላማውና የጎፈሬ ስፖርት ትጥቅ ማምረቻ ሃላ/የተ/የግል ማህበር ስራ አስኪያጅ አቶ ሳሙኤል መኮንን የስምምነት ፊርማቸውን አስቀምጠዋል።
በፊርማ ስነ-ስርዓቱ ላይ የባሕር ዳር ከተማ ስፖርት ክለብ የቦርድ አመራሮችና አባላት የተገኙ ሲሆን የክለቡ ፕሬዚዳንት አቶ ጎሹ ከፊርማ ስነስርዓቱ በኋላ የስራ መመሪያ ሰጥተዋል። ከባሕር ዳር ከተማ ስም ጀርባ በዋናነትና በኩራር የሚነሳው ባሕርዳር ከተማ የጣናው ሞገድ የሁላችንም መለያችን በመሆኑ ለድል እንዲበቃ የከተማ አስተዳደሩ ቅድሚያ ተሰጥቶ በፋይናንስ፣ በአመራርና በባለቤትነት በመደገፍ ይሰራል ብለዋል። አቶ ጎሹ እንዳላማው የባሕር ዳር ከተማ ከንቲባ እና የክለቡ ፕሬዚዳንት በሰጡት የስራ መመሪያ እንዳሉት ክለቡ በሃብት ራሱን የቻለ ፣ ከፍተኛ አቅም ያላቸው አጋሮች አብረውት እንዲሰሩ የስራ አመራር ቦርዱ ቅድሚያ ሰጥቶ እንዲሰራ አቅጣጫ ሰጥተዋል።
በተለይም በአህዝቦትና ኮሙኒኬሽን የታገዘ ተግባር ተጠናክሮ እንዲሰራም አደራ ብለዋል። ጎፈሬ ከክለቡ ጋር የስፖርት ትጥቅ ለማቅረብ የተፈራረመው ውል ለቀጣይ አምስት አመታት በጋራ ለመስራት የሚያስችል ሲሆን ለተጫዋቾች፣ ለአሰልጣኞችና ለደጋፊዎች እንዲሁም ለአመራሮች የተለያዩ የስፖርት ትጥቅ አይነቶችን ለማቅረብ የተስማማ መሆኑን ከስምምነቱ ሰነድ ለመረዳት ተችሏል።
